كيف تفحص قوة البطارية والدينامو بجوالك؟ (تجربتي مع فيش الولاعة

 

مريت بموقف في الديرة علمني إن مراقبة "الفولت" في تطبيق الفحص (OBD2) أهم من مراقبة عداد البنزين أحياناً!

الموقف: 16 دقيقة كانت كفيلة بتعطيل الموتر!

كنت في الديرة ومشغل نور خارجي على فيش الولاعة حق السيارة. بالحسابات العادية، المفروض البطارية تمشيني ساعة على الأقل والنور شغال والموتر طافي. لكن الصدمة إني بعد 16 دقيقة فقط، جيت أشغل الموتر عشان الدينامو يشحن البطارية، لكن الموتر "عصى" وعيا يشتغل! اضطررت أكلم ناس يفزعون لي عشان "اشتراك".

كيف تعرف قوة بطاريتك من تطبيق الفحص؟

بدال ما تنتظر الموتر يطفى عليك، تقدر تفتح تطبيق الفحص (مثل Torque) وتراقب قراءة (Control Module Voltage) أو (Battery Voltage):

1. والموتر طافي: لازم تكون القراءة بين 12.2 إلى 12.6 فولت. إذا نزلت عن 12 فولت، معناه البطارية بدأت تضعف ولازم تشغل الموتر فوراً.

2. والموتر شغال: هنا أنت تفحص الدينامو. لازم القراءة تكون بين 13.5 إلى 14.5 فولت. إذا كانت أقل من 13، معناها الدينامو فيه مشكلة وما قاعد يشحن البطارية صح.

نصيحتي لراعي البر والطلعات:

• لا تعتمد على "عمر" البطارية: حتى لو جديدة، السحب المستمر من فيش الولاعة يضعفها بسرعة.

• راقب الجوال: وأنت جالس في البر ومشغل أغراضك، افتح التطبيق وشوف الفولت. أول ما تشوفه وصل 12 فولت، شغل موترك 10 دقائق يشحن وريح رأسك.

• تجنب "الورطة": في الخلا ما فيه أحد يفزع لك بسرعة، فاجعل تطبيق الـ OBD2 هو عينك الثالثة على كهرباء الموتر.