كيف تفحص فيوزات سيارتك بنفسك وتكشف الأعطال في دقيقة؟
السلام عليكم.. كثير تصير معنا إن المكيف يطفي فجأة، أو جهة من الأنوار ما تشتغل، وأول شي نسويه نروح لكهربائي ويأخذ مبلغ وقدره والحل غالباً يكون "فيوز" سعره بريال واحد! اليوم بعلمكم كيف تفحصون الفيوزات بأداة بسيطة (مفك الفحص) ومن واقع تجربتي.
وش هي أداة الفحص (الاختراع البسيط)؟
حقين الكهرباء يستخدمون مفك داخله لمبة صغيرة، طالع منه سلكين:
1. سلك يمسك البودي: تشبكه في أي حديدة في جسم السيارة (الأرضي).
2. السلك الثاني (المفك): يكون رأسه مثل الإبرة عشان يدخل في فتحات الفيوز.
كيف تعرف إذا الفيوز محروق أو العطل من القاعدة؟
من تجربتي، الطريقة الأضمن هي:
• افصل الفيوز اللي شاك فيه (لكن انتبه وأنت تفصله لا تقطع الأسلاك الصغيرة اللي جوا من قوة السحب).
• حط رأس المفك (الإبرة) في "سن" قاعدة الفيوز في علبة الفيوزات:
• إذا اشتغلت اللمبة: يعني الكهرباء واصلة تمام للقاعدة، والبلا كان من الفيوز نفسه ويحتاج تغيير.
• إذا ما اشتغلت اللمبة: يعني المشكلة أكبر والكهرباء أصلاً مو واصلة للمكان هذا.
⚠️ تحذير "نصائح " الذهبي (الأمبير):
انتبه، ثم انتبه! لو لقيت فيوز محروق وقوته مكتوب عليها 20، لا تركب مكانه 30 أبداً.
• لو حطيت رقم أكبر: ممكن تسبب التماس أو تخرب الضفيرة لأن الفيوز ماراح يحميك.
• لو حطيت رقم أصغر: الفيوز بيحترق عليك فوراً أول ما تشغل الجهاز.
دايم ركب نفس الرقم المكتوب على العلبة.
النتيجة:
بهذي الطريقة البسيطة، تقدر تعرف عطل سيارتك وأنت واقف مكانك، وتوفر تعب المشوار ومصاريف الكهربائي اللي ممكن يغير لك قطع ما تحتاج تغيير
تعليقات
إرسال تعليق